Kronikë e jetëve të humbura
Kronikë e jetëve të humbura
Ing. Orhan Sakiqi
Nga Roald A. HYSA
Ata që nuk e
njohin historinë janë të dënuar ta përsërisin atë. George
Santayana
Pikërisht ky është edhe thelbi i
këtij libri me rrëfime jetësh të ndryshme njerëzore, të cilët dalin nga kujtesa
dhe përjetimet e ing. Orhanit zbardhen nëpër gazeta të ndryshme dhe tashmë
marrin formën e një libri. Një libër i shkruar me dashuri për të luftuar me
harresën zyrtare që ofronte regjimi i kaluar komunist pasi të kishte etiketuar
si “armik i popullit”. Mirëpo era e lirisë do të frynte edhe në Shqipëri për
t,i dhënë fund represionit dhe dhunës shtetërore komuniste. Tashmë pas rreth 28
vitesh demokraci jemi në një garë me “harresën zyrtare” të imponuar nga
komunizmi me etiketat e tij të gatshme “armik i popullit” apo “i deklasuar e
kulak”. Së fundmi kemi përjetuar edhe një debat të nxehtë politik, për shkak se
vazhdohet ende me mentalitetin që “ne e fituam luftën dhe ne duhet ta bëjmë
historinë”. Një histori e manipuluar me gënjeshtra, ku njerëz të ndershëm e që
u rritën e punuan me dashuri e përkushtim ndaj këtij vendi u etiketuan si
“armiq të popullit”, madje u pushkatuan dhe nuk iu dihet varri edhe sot e kësaj
dite.
Një dilemë e autorit të këtij
libri është se janë gjetur eshtrat e 2000 të vrarëve, por ende nuk i dihet
varri rreth 4,500 të tjerëve. Një dramë njerëzore e përshkruar në faqet e këtij
libri është ajo e bashkëshortëve të nderuar Akil e Nevrez Sakiqi. Një bashkëshorte
dhe nënë e përkushtuar që u nda nga kjo jetë me pengun se ku prehej trupi i
bashkëshortit të saj, një peng që ia transmetoi edhe pasardhësve që la mbrapa. Kjo
është një pjesë e tragjedisë që përjetuan 60 familje, të cilave iu zhdukën
familjarët e tyre në Masakrën e Tiranës të tetor-nëntorit 1944.
Autori i këtij libri nëpërmjet copëza
rrëfimesh na jep copëza tragjedish e dramash të përditshme që u përjetuan nën
regjimin komunist të enverit nën poshtërimin që iu bë njerëzve të ndershëm nga
e ashtuquajtura luftë e klasave e imponuar nga mësimet marksiste-leniniste me
dhunë, me gjak e me shkatërrim jetësh të pafajshme.
Në këto rrëfime përfshihen jo
vetëm prindët e autorit tonë Orhan Sakiqi, por edhe emra të njohur të motrave
Qiriazi, arkitektit të mirënjohur Petraq Kolevica, patriotit të shquar tiranas
Rexhep Jella etj. Në këto rrëfime të shkurtra, por shumë domethënëse janë
përmbledhur në formë copëzash mozaiku të gjitha pasojat e “luftës së klasave”.
Personazhet e këtij libri janë të gjitha reale dhe janë miq e të afërm të
autorit, pra gjithçka që na përcillet është material jetësor i dorës së parë
edhe si dëshmi e gjallë për të gjithë brezat në vijim. Pjesa më e madhe e tyre
nuk jeton më, kanë ndërruar jetë, vetëm se nëpërmjet këtij libri tashmë janë
bërë pjesë e një kujtese më të gjerë. Ata do të jenë pjesë e bibliotekave tona,
të cilat duhet t,ua trashëgojmë fëmijëve tonë. Një vend të konsiderueshëm në
këto rrëfime zen edhe miku i tij Agim Musta me shifrat e Librit të Zi të Komunizmit,
po ashtu edhe ish-të dënuarit politikë Abdulla Berberi e Skënder Kosova, që të
dy këta të fundit nuk janë më midis nesh. E pra në këtë libër autori ka
përfshirë një mini-enciklopledi personazhesh, ku në fund ai jep edhe një
opinion e analizë të gjerë të asaj që ka ndodhur dhe se si duhet trajtuar nga
institucionet përkatëse. Ky është libri i pestë i dalë nga duart e tij dhe
njëkohësisht një libër që i shtohet bibliotekës së memories të familjeve të
ish-të përndjkurve politikë të regjimit komunist.
Librin e lexova me shumë kënaqësi
edhe për vetë faktin se disa prej tyre kanë qenë edhe miqtë e ngushtë të babait
tim Allaman Hysa, por që i kam njohur dhe i kam takuar, si arkitekti Petraq
Kolevica, profesor Kolec Topallin, që kam pasur pedagog, apo Abdulla Berberi e
Skënder Kosova.
Comments
Post a Comment