Lenini dhe boria e veturës

Lenini dhe boria e veturës

Lenini së bashku me një delegacion sovjetik zbritën nga një anije, e cila e kishte transportuar delegacionin për të shkuar në Amerikë për disa takime zyrtare me qeveritarët e lartë amerikanë. Në anije kishin marrë edhe një makinë prodhim sovjetik ZIL (zavot imja Lenin) për të treguar arritjet e mëdha të klasës punëtore sovjetike. Nga porti deri në vendin e hotelit ku do të strehohej delegacioni ishin rreth 25km rrugë. Punëtorët e portit e zbresin makinën dhe Lenini me bashkëpunëtorët e vet e ndezin dhe nisen për në destinacion. Pas një kilometri rrugë makina fiket dhe megjithëse e provuan ta ndezin, ajo nuk ndizej aspak. E provuan të gjithë me radhë, përsëri makina nuk ndizej. Lenini ju thotë shokëve të vet, që ta shtyjnë, sepse nuk mund të përdorin makinat e borgjezisë punëtorët sovjetikë si mjete transporti për udhëtarët.

E shtynë makinën për disa kilometra, porse përfaqësuesve të klasës punëtore sovjetike iu doli llapa nga lodhja, dhe iu lutën shokut Lenin që ta fusnin makinën në servis e ta rregullonin, sepse ata nuk dinin se si të vepronin me makinën. I pa disa herë shtrembër bashkëpunëtorët e vet për atë që i kërkonin, mirëpo e kuptoi se më mirë do të ishte ta rregullonin e të vazhdonin rrugën.

Për fat një servis makinash gjendej aty afër dhe ata ia dorëzuan makinën ustait xhenerik. Ai i tha që të vinin pas një ore e ta merrnin të rregulluar. Kalon ora dhe shoku Lenin së bashku me bashkëpunëtorët e vet të delegacionit paraqiten përpara kapitalistit amerikan për të marrë në dorëzim makinën. Kur po e merrte makinën ai e pyeti xhenerikun:

-Çfarë kishte makina?

-Asgjë,- i përgjigjet ustai.

-Si asgjë?...

-Asgjë, të gjitha ishin në rregull, kishin bërë disa lidhje gabim, unë vetëm sa i çova në vend gjërat.

-Nuk ka mundësi,- i thotë i revoltuar Lenini, -nuk ka mundësi kjo!!!

-Po, është e vërtetë- i thotë qetësisht ustai.

-Nuk kishte ndonjë gjë që të ishte në rregull fare, të gjitha nuk ishin...- po këmbëngulte Lenini shumë i revoltuar.

-Ah, po më fal, kishte diçka që punonte shumë mirë, madje ajo ishte prodhimi më i mirë...

-He pra, kush ishte?

-Boria, ajo punonte shumë mirë, bjeri borisë, se i bie shumë bukur...