HOXHË SULEJMAN ISLAM KODRA
HOXHË SULEJMAN ISLAM KODRA
Hoxha që me guximin
e tij e mbrojti fenë deri në pikën e fundit
të jetës
Lindi në fshatin
Vilëz të Tiranës në vitin 1913
në një familje me tradita fetare, ku edhe
babai i tij ishte hoxhë. Në moshën dy vjeçare i vdes babai dhe
rritet nën kujdesin e xhaxhallarëve të tij. Ata
kujdesen për shkollimin e nipit të tyre, që me
mbarimin e arsimit fillor e dërgojnë në mejtep me mësues Hasan Efendiun dhe
Mulla Limanin. I përkushtuar ndaj mësimit të Fesë
Islame, dhe atij të Kuranit, në moshën 20 vjeçare përfundon shkollimin dhe paraqitet pranë
Myftinisë së Tiranës, në komisionin
e vlerësimit për të marrë dekretin e imamit. Komisioni e vlerësoi
shumë mirë përgatitjen e Sulejmanit dhe e pajisi
me dekretin e imamit për në fshatin e tij. Në fillim punon me hoxhë Abdulla
Hysenin, i cili më pas largohet me banim në Tiranë dhe e zëvendëson
Sulejmani. Me sjelljen e tij të mirë, me përkushtimin
ndaj Fesë Islame, imami i ri fitoi besimin e fshatarëve të zonës. Në çdo
ceremoni fetare do të ishte prezent dhe e kryente me vendosmërinë më të madhe.
Ndalimi i fesë me Ligj nga pushteti monist në vitin 1967 ishte një ngjarje tragjike për HOXHË SULËN. Ai u përball me egërsi me kuadrot komuniste të pushtetit lokal. Bashkë me 15 burra
hyri në xhami dhe nuk pranuan të dalin veçse
të binin dëshmor brenda në xhami. Pushtetarët
i mbyllën nga jashtë dhe u larguan. Qëndruan 24 orë të mbyllur dhe
përsëri pushtetarët erdhën të shembnin minaren. U mbështetën pas minares,
ndërsa pushtetarët me forcë e mbushën xhaminë
me drithin e kooperativës. Kompromisi për t'u larguar u bë kur HOXHË SULA i kërkoi një deklaratë atyre, ku personat
që do të shembnin minaren, kur të rihapej
feja duhet të ishin po ata, që do ta ndërtonin përsëri me fondin e tyre. Ata pranuan ta nënshkruanin deklaratën, të cilën ai e
ruajti deri në fund të jetës së tij; por ai
nuk arriti të shohë rihapjen e fesë dhe të institucionit
të saj.
Ai u tregua
i vendosur dhe i palëkundur në kryerjen e ritualeve fetare në shtëpi dhe
të ceremonive mortore për të gjitha ato
familje që e kërkonin
një gjë të tillë. U ndoq vazhdimisht nga pushtetarët komunistë, por
Ismail Çaushi, ish-sekretar i parë i Rajonit 4 të Tiranës (rajon që mbulonte
fshatin), i lëshoi një letër-leje, që të mos prekej
për moshën e pleqërisë që kishte. I shkuan në shtëpi kur
ai nuk ishte dhe ia morën librat fetare e Kuranin për t'ia djegur. Menjëherë e lajmëruan,
e me shumë guxim ai i akuzoi si hajdutë, sepse
kishin hyrë e dhunuar shtëpinë
pa prezencën e
tij. U detyruan t'ia dërgonin librat dhe Kuranin, të cilët i
mbajti me vetëmohim deri në fund të jetes. Në moshën 76 vjeçare,
me date 01.09.1989 ndërroi jete.
Allahu e pastë bërë nga shehidët për
guximin dhe vendosmërinë që tregoi
në ruajtjen e fesë së vet.
Nxjerrë nga libri “Personalitete të Kulturës Fetare e Atdhetare të Tiranës” me autor Xhemal Balla.
Comments
Post a Comment