Java në një ditë- ALBANIA FM radio 15 shkurt 2014
Java
në një ditë
15
shkurt 2014
Selamu alejkum të nderuar dëgjues të ALBANIA FM radio nga
unë Roald Hysa. Pas një jave po dëgjohemi përsëri në valët e radios tonë në
pritje të javës në vazhdim, e cila shpresojmë se do të jetë më e mirë. Shumë
halle e shumë telashe iu ranë mbi shpinë njerëzve tonë gjatë kësaj jave dhe
ndoshta ky fundjave do të jetë më i mirë për të gjithë ne. Shumë nëna u veshën
me të zeza, e shumë njerëz derdhën lotë për të afërmit e tyre të vrarë në
aksidentet automobilistike. Një bilanc tragjik na thotë se brenda një dite javën
që shkoi humbën jetën e tyre 13 frymë të moshave të ndryshme... të nderuar dëgjues
asgjë nuk i sjell më në jetë ata njerëz, kini kujdes për më tej. Bota e artit
humbi disa nga ata artistë që mbajtën peshën kryesore të një të kaluare. E
qeshura e Skender Sallakut u fik dhe pritet edhe ajo e Met Begës, në mos është
shuar në këto çaste që po flasim. Politika vazhdon rrugëtimin e vet të përditshëm
me shfaqjet e saj për konsum. Të rinjtë janë në qendër të vëmendjes së politikës,
e cila po drejtohet nga burra të pjekur në moshë. Ndërkaq janë shoferët e
furgonave dhe të transportit urban ato që kanë sjellë turbullirat në këtë javë,
madje dita e të dashuruarve u prish nga greva e urbanëve në Tiranë dhe nga shiu
me shkulme që nuk pushoi gjatë gjithë paradites. Njerëzit rendin për të
zgjidhur hallet e tyre me spitalet dhe shëndetin, ndërkaq ne do të vazhdojmë të
mbështesim apelet e tyre nga valët e radios tonë, e cila është e hapur në këtë
drejtim. Po le të vazhdojmë pa humbur kohë t’ju sjellim në vëmendjen tuaj ato
probleme të përbashkëta të javës që shkoi.
Met Bega prej 10 vjetësh me Parkinson
“Epilogu” i trishtë i një jete artisti. Po sjellim në vëmendje jetën e
artistëve të mëdhenj të skenës shqiptare, të cilët kanë shënjuar në zemrat e
shqiptarëve, por jetojnë të zhytur mes vështirësive në harresën e atyre që
duhet t’i kthejnë sytë tek ata dhe t’u shtrijnë dorën. Ka qenë vajza e artistit Met
Bega, e cila ka bërë publike në media dhe rrëfeu vështirësitë me të cilat
përballet i ati, i cili vuan prej 10 vjetësh nga sëmundja e parkinsonit.
Matilda Bega deklaroi se askush nuk është interesuar dhe nuk ka pyetur për
babain e saj, por edhe kur ai ka trokitur vetë në dyert e institucioneve nuk ka
marrë asnjë përgjigje. “Askush nuk ka pyetur për babain. Madje kanë arritur në
ekstrem, nuk i jepnin as pensionin minimal që i takon, 20 mijë lekë. Është
dashur ndërhyrja e Fiks Fare, u sensibilizuan se Met Begën e kishin lënë pa
pension. Merr disa ilaçe shumë të shtrenjta. Babi është i paralizuar, është në
krevat prej më shumë se 2 muajsh. Ilaçet afërisht 300 mijë lekë të vjetra, plus
një grua që kujdeset për të. Askush nuk ka telefonuar kurrë. Të vetmit që kanë
telefonuar janë biznesmenët, apo njerëz nga jashtë vendit. Shteti shqiptar
besoj nuk e di është gjallë apo jo, Ndërkohë që njerëzit e dinë. Është e
turpshme të paguhet 20 mijë lekë në muaj. Të gjitha shpenzimet përballohen nga
vëllai im, që jeton jashtë. Falë zotit është ai. Babi ka shkuar kudo, në
presidencë, në parti, në Ministrinë e Kulturës, në zyrën e kryeministrit
paraardhës.”- u shpreh vajza e artistit Met Bega. “Gjej rastin ti bëj
thirrje ministres së kulturës për ndihmë. Ai tashmë është drejt fundit,
sëmundja përparon shumë shpejt dhe ai ka nevojë për ndihmë. Megjithatë di të
them që shpresë nuk kam. Ministrja mund të bëjë një kërkesë për një pension të
veçantë.”- deklaroi Matilda Bega. Një jetë e famshme në
skenën e ekranit dhe të teatrit, tashmë po shuhet pa lavdi, duke shtrirë dorën
për ndihmë. E si mund të kujtohen për Metin, kur janë të zënë me makro e
mikro-politika kulturore? E si mund të kujtohen për Metin, kur sot dominon
humori vulgar e banal?
Ndahet nga jeta një prej ikonave të humorit, ‘Artist i Popullit’, Skënder
Sallaku
Ndahet nga jeta në moshën 79-vjecare një
prej ikonave të humorit, Skënder Sallaku. I konsideruar si një prej ikonave të
humorit shqiptar, Sallaku vuante kohët e fundit nga një sëmundje e rëndë. Në 10
ditët e fundit gjendja e tij shëndetësore u rëndua së tepërmi. Brenda një harku
kohor të shkurtër ai kreu 3 ndërhyrje kirurgjikale. Skënder Sallaku lindi në
Tiranë më 1935, dhe është konsideruar si një nga aktorët tanë më të mirë të
humorit; me skeçe dhe parodi të ndryshme ai e ka bërë
publikun shqiptar të qeshë me shpirt. Aktori
është nderuar edhe me titullin e lartë ‘Artist i Popullit’. Sallaku njihet dhe
si ish-kampion kombëtar në mundjen klasike. Brenda
një kohe të shkurtër vdekja rrëmbeu 4 kolosë të artit shqiptar, klarinetistin
Laver Bariu, violinistin Ibrahim Madhi, këngëtaren Vaçe Zela dhe së fundmi dhe humoristin Skënder Sallaku. Brenda
një kohë kaq të shkurtër opinioni publik humbi 4 gjigandë, që lanë pas një emër
të çmuar, që e vunë përmes veprave të mëdha që i përcollën sa ishin
gjallë, vepra që do të kujtohen për një kohë të gjatë nga populli. Njëri pas
tjetrit po shuhet ai brez artistësh që bëri epokë për një gjysëm shekulli të
mileniumit që shkoi. Ata i përkasin brezave të regjimit të vjetër, por që sollën
sadopak kënaqësi në jetën e një regjimi të ashpër e jo njerëzor. Brezi i artistëve
të diktaturës do t’i emërtonte dikush.
'Furgonat',
Shoferët: Na mbajnë me bukë. MTI: Fund konkurrencës së pandershme
Në ditën e 7 të protestës, drejtuesit e
furgonave 8+1 kanë reaguar dhe mbi deklaratat e ministrit të Transporteve
Edmond Haxhinasto dhe atij të Brendshëm, Sajmir Tahiri, që kërkuan ndalimin e
transportit me furgona. Nga Korça, shoferët u shprehën se janë tepër të indinjuar me vendimin drastik që
përfshin paketa e re e masave mbi sigurinë rrugore që pritet të miratohet nga
qeveria. Sipas zërit unanim të drejtuesve të furgonave, me këtë punë mbahen
familjet e tyre. “Me këtë punë mbajmë
me bukë fëmijët. Tahiri të ndëshkojë përgjegjësit e aksidenteve dhe jo njerëzit
e ndershëm”. Më tej shoferët protestues i bënë thirrje qeverisë të mbajë
premtimet për përmirësimin e ekonomisë së shqiptarëve dhe jo të rrënojë më tej
jetët e tyre. Protestës së drejtuesve të furgonave taksi 8+1 të Korçës iu bashkuar fillimisht edhe ata të Kukësit. “Është
e pafalshme, nuk duhen bllokuar furgonat. Për ne janë buka e gojës, kështu
mbyllen vende pune nuk hapen vende pune. Kjo qeveri të kontrollojë transportin
e paligjshëm, jo ne të ligjshmit”, u shprehën drejtues të furgonave të
transportit të pasagjerëve në Kukës. Sipas shoferëve, nëse ky vendim i qeverisë
do të zbatohet atëhere protesta do të përshkallëzohet deri në bllokimin e
rrugëve nacionale. Ministria e Transporteve ka reaguar për protestën e
furgonave 8+1, që tashmë vazhdon prej disa ditësh dhe ka marrë shtrirje thuajse
në të gjitha qytetet e vendit. Në një njoftim për shtyp nga kjo ministri bëhet
me dije se nisma e qeverisë synon zbatimin e kuadrit ligjor dhe zbatimin
rigoroz të ligjit në fushën e transportit. Sipas ministrisë kjo nismë do t’i
japë fund konkurrencës së pandershme në transportin ndërurban. Në Fier,
Shkodër, Durrës, Vlorë, Elbasan, Lushnjë, Burrel janë zhvilluar protesta dhe
reagimet kundër deklaratës së Ministrave Haxhinasto dhe Tahiri që parashikon
ndalimin transportit të udhëtarëve me furgonë. Rirregullimi i transportit
ndërurban nuk mund të bëhet me goditjen e furgonave të licencuar dhe gjobitjen
e tyre të rregullt nga ana e rrugorëve. Terminalet moderne dhe ndërtimi i tyre
nëpër qytetet e ndryshme të vendit do ta licensonte edhe më tej këtë fushë të
transportit dhe kjo duhet të bëhet pjesë e axhendës së pushtetit lokal.
Lulzim Basha:
20 Shkurti një ndarje mes dy epokave
Kryetari i Partisë Demokratike Lulëzim
Basha u takua me strukturat e partisë demokratike në Elbasan në kuadër të turit
të tij mbarëkombëtar me strukturat e kësaj partie. Gjatë fjalës së tij në këtë
takim Basha theksoi se PD është parti moderne dhe evropiane dhe se asaj i janë
bashkuar qindra anëtarësime të reja. Ai e vlerësoi 20 Shkurtin, ditë kur
opozita ka paralajmëruar, se do të zhvillojë një protestë të fuqishme, si ditën
që do të bëjë një ndarje mes dy epokave. “Të gjithë së bashku në luftën e
drejtë opozitare. Mirëpresim në PD, ata që duan fitoren e shpejtë. Jemi për
bashkim dhe ribashkim të demokratëve.”- u shpreh Basha. Ai vlerësoi themeluesit
e Partisë Demokratike. Sipas Bashës asnjë parti nuk ka të ardhme pa brezin e
rinisë. Çdo qytetar shqiptar, sipas zotit Basha, ka sot arsye të mjaftueshme
për t’ju bashkuar më 20 shkurt marshimit të protestës. “Për ti thënë ndal
abuzivizmit, arrogancës, korrupsionit, varfërisë, papunësisë, taksave të larta,
çmimeve të larta, me 20 shkurt në orën historike 14.00 në sheshin historik
Skënderbej, në marshin tonë të protestës popullore. Të gjithë së bashku në
luftën e drejtë opozitare për të shembur nga themelet antivlerat që po na i
imponon ky pushtet” -deklaroi lideri i opozitës, Lulzim Basha. Është një
thirrje krej normale që po bëhet nga opozita. E vështirë do të jetë të risillen
ato ndjenja të papërshkrueshme për të gjithë shqiptarët, e në veçanti për të gjithë ata të
përndjekur e të burgosur të regjimit famëkeq enverist, normal që ata do t’i
shihnin me skepticizëm këto përpjekje.
Aksidente në Pogradec e Kurbin, 3 persona të vdekur, 2 të plagosur
Aksidentet me makina kanë përgjakur
sërish rrugët e vendit. Tre aksidente të ndryshme janë shënuar në 3 qytete të
vendit, ku viktima kanë mbetur kalimtarë dhe në një prej tyre një person me
bicikletë. Të tre janë përplasur nga automjete që qarkullonin tej normave të
lejuara të shpejtësisë. Aksidenti i parë, makina përplasi 2
kalimtarë, njëri humb jetën në vendin e ngjarjes, tjetri dërgohet në gjendje të
rëndë në spital. I plagosur dhe shoferi i automjetit. Gati
njëkohësisht me aksidentin në Pogradec, një aksident tjetër i rëndë me pasojë
vdekjen e një personi u shënua në Laç.
Një i moshuar rreth 75 vjec ka gjetur vdekjen e menjëhershme pasi u përplas me
një makinë. Në momentin e aksidentit, i moshuari Gjon Kola ishte duke
lëvizur me një biçikletë. Një aksident i tretë u shënua, kësaj
radhe në Kurbin, ku viktimë mbeti një kalimtare. Ngjarja ndodhi në fshatin
Skuraj ku një automjet ka përplasur për vdekje këmbësoren, Dava Pjetri. Mësohet
se Dava Pjetri kishte mësuar për aksidentin e Gjon Kola në Laç dhe nga fshati Skurje është nisur të mbërrijë në Laç, por fatkeqësisht një makinë e ka përplasur teksa ajo
po kalonte rrugën. Pa harruar këtu aksidentin e rëndë në Kukës, ku brenda një
jave humbasin jetën rreth 19 njerëz. Pakujdesia njerëzore dhe mos-respektimi i
rregullave të qarkullimit janë shkaqet më të rëndomta pas hetimeve të bëra nga
specialistët rrugorë. Njerëzit në timon nuk po tregohen të kujdesshëm dhe
pasojat më pas janë të rënda.
24-vjeçarja
luftë me vdekjen
Brunilda është vetëm 24 vjeç. Prej
kohësh ajo po lufton me sëmundjen e saj të trashëguar që njihet si pika gjaku
kancerogjene. Pak kohë më parë ajo ka humbur syrin e majtë, ndërsa sot nga syri
i djathtë shikon vetëm 25%. Prej vitesh kurohet në Athinë, meqenëse atje ka
jetuar, por sipas familjarëve që tashmë janë kthyer në Fier, ndërhyrja
kirurgjikale që ju bë atje në kokë nuk ka qenë e suksesshme dhe vajza rrezikon
tashmë edhe jetën. Familjarët që prej vitesh kanë harxhuar gjithçka, një muaj
më parë i kanë bërë analizat 24 vjeçares në Lozanë të
Zvicrës. Mjekët zvicerianë i kanë
këshilluar që urgjenca kryesore mbetet shpëtimi i jetës së 24-vjeçares dhe më
pas të sigurojë mbajtjen e shikimit në masën 25%, për të cilin duhet të kryejë
operacionin që kushton 30 mijë euro. Duke qenë se mundësitë e familjes janë të
pakta vetë Brunilda apelon për të gjithë ata që mundet ta ndihmojnë. “Kam këtë problemin me syrin, janë
pika gjaku kanceroze. Unë kërkoj ndihmë, kam nevojë për ju. Ju lutem merreni
seriozisht gjendjen time dhe më ndihmoni, sepse jam 24 vjeçe, jam me një sy”,
shprehet ajo. Kushërira e saj
Jola Hoxhaj i është drejtuar mediave për të kërkuar sensibilizim, pasi në
Ministrinë e Shëndetësisë nuk i kishin dhënë shpresë. Ajo tregon se i ati i
Brunildës pak vite më parë në moshën 48-vjecare ka ndërruar jetë po nga e
njëjta sëmundje dhe që kushërira e saj të mos ketë fatin e të atit, ajo apelon
për ndihmë. Edhe ne si radio i
bashkohemi kësaj thirrje për ndihmë, duke apeluar tek dëgjuesit tanë ta
ndihmojnë Brunildën. Sot është ajo që ka nevojë për ndihmën tonë, por ndoshta
do të jemi ne që do të kemi nevojë për ndihmë. Jetës nuk i dihet, sot je shëndoshë
e mirë, nesër ke nevojë urgjente për mjekun...
Dramat njerëzore me sëmundjet e tyre fizike kanë
qenë pjesë e vëmendjes së publikut, por nuk janë bërë pjesë e zgjidhjes tonë. Flitet
shumë për rininë, por ëndrra e saj është të rrinë bareve gjithë ditën duke pirë
kafe e konsumuar thjesht llafe të kota. Rini pa ideal. Nuk po themi që të mos
argëtohen njerëzit, por ne duhet të gjejmë kohë edhe të ndihmojmë. Dora që jep është
më e mirë se dora që merr,- na porosit profeti jonë Muhamedi. Tendenca e shoqërisë
sonë sot është vetëm të marri dhe përfitimet materiale e monetare janë në qendër
të vëmendjes, e cila po harron se ka vlera shpirtërore për të ruajtur e zhvilluar.
Ajo po materializohet maksimalisht dhe nuk po shohin përtej hundës së vet.
Ndihma nuk është vetëm materiale, jeta nuk është vetëm të fitosh para, e të
mbledhësh mall, por edhe të japësh nga ajo që fiton. Begatia nuk shprehet duke
marrë, por duke dhënë. Dhe jo t’i japësh thjesht atij që ke afër para. Mirësia
e veprimit qëndron edhe në mënyrën se si e kryen atë mirësi. Të mos e shohi
dora e majtë se çfarë po jep e djathta, është një tjetër këshillë e vyer dhe
porosi e hoxhallarëve tonë. Dita fillon e mbaron shpejt, po ashtu edhe java
shkoi e iku, dhe kështu kanpër të ikur ditë e javë të tjera. Iku edhe 14
shkurti, por dashuria nuk mbahet me një ditë në vit. Viti ka 360 ditë dhe ja se
çfarë thotë Rumiu:
Nuk e ke idenë se sa e vështirë
ishte të gjeja një dhuratë për ta sjellë.
Asgjë nuk më dukej gjëja e duhur.
Cfarë kuptimi ka t’i sjellësh ar
një miniere ari, apo ujë oqeanit?
Cdo gjë që gjeja ishte si të
sillja erëza të Lindjes.
Nuk mund të dhuroj zemrën
time as shpirtin tim, sepse ato janë tashme të tuat...
Kështu që të solla një
pasqyrë...
Shikohu dhe me kujto!!!
Po e mbyllim këtë transmetim
me këto vargje dhe pa komente të mëtejshme. Ishit deri tashti në valët e
ALBANIA FM radio me mua Roald Hysën. Do
të dëgjohemi përsëri javën e ardhshme në po të njëjtën frekuencë 90,4 mgh, deri
atëherë gjithë të mirat e Selam Alejkum.
Comments
Post a Comment