Java në një ditë- ALBANIA FM radio 90,4 mgh 8 mars 2014
Java në një ditë
8 mars 2014
Selam alejkum të nderuar të
dëgjues të ALBANIA FM radio. Unë jam Roald hysa dhe po dëgjohemi sërish në 90,4
mgh në këtë të shtunë të dytë të marsit në emisionin tim të përjavshëm “Java në
një ditë”. Ditët trokasin njëra pas tjetrës në shpinën tonë për të ikur e për të
mos u kthyer mbrapsht. Sipas ditëve që kaluan ka pasur shumë ulje e ngritje në
jetën tonë të përditshme. Çmime të ngritura dhe niveli i krimeve që nuk bie.
Protestat kanë vazhduar dhe qeveria i ka etiketuar ato si partiake. Partiake
apo jo kjo nuk ka kurrfarë rëndësie. Problemet dhe hallet që kanë paraqitur
njerëzit nëpër këto mitingje qëndrojnë. Një zhvillim i mirë është se njerëzit e
kanë shprehur pakënaqësinë e tyre, duke i qëlluar me vezë e me gurë qeveritarët
e tyre. Nga karafilat e kuq kemi kaluar te karafilat e bardhë të sindikalistëve.
Po ashtu goxha para kanë bërë këto ditë dyqanet e luleve dhe të dhuratave dhe
ky është një lajm i mirë besoj. Nxënës të lumtur dhe mësues të lumtur të paktën
për një ditë në vit. Kujtojmë këtu përpjekjet e bëra nga shumë patriotë në dobi
të arsimit tonë, ku një vend të rëndësishëm zenë Elbasani dhe Korça. Hafiz
Dalliu është një emër që duhet ta dinë të gjithë mësuesit në të gjithë Shqipërinë
dhe në të gjithë vendin. Pa emrin dhe përkrahjen e tij dhënë Normales së
Elbasanit vështirë se do të kishim pasur shkollën e parë, e cila do të
furnizonte me mësues të gjithë Shqipërinë. I këtij mendimi ka qenë i pari Luigj
Gurakuqi. Të lexosh një libër është bërë e vështirë këto ditë dhe na vjen mirë,
që Ministria e Kulturës do të subvencionojë librin. Hallet me sa duket nuk kanë
të mbaruar dhe rendi vazhdon të jetë pika e dobët e javës që shkoi, po ashti si
edhe për disa javë që shkuan. Policëve iu duhet të mos flenë natën, sepse krimi
punon natën më shumë se sa ditën. Rregullimi i jetës sociale dhe edukimi e
shkollimi e ulin nivelin e krimit. Megjithatë ka pasur disa tendenca dhe le t’i
ndjekim ato së bashku.
Petrit Vasili goditet me vezë, ndalohet autori
Një incident ka ndodhur para selisë së Presidencës, ku kreu i grupit të
LSI-së Petrit Vasili është qëlluar me vezë nga një 65-vjeçar. Zoti Vasili doli përpara mediave pas
takimit këshillimor që zhvilloi me kreun e shtetit, në lidhje me zgjedhjen e
anëtarit të ri të Gjykatës së Lartë, kur u sulmua nga 68-vjeçari Mustafa
Gjyzeli, i cili mësohet se ka goditur me vezë makinën e Vasilit edhe një vit më
parë. Kreu i grupit të LSI-së ka
ruajtur qetësinë, duke vijuar deklaratën për mediat, ndërsa efektivët e Gardës
kanë bërë të mundur ndalimin e autorit të sulmit, i cili u dërgua në
Komisariatin Nr. 2. I pyetur nga gazetarët lidhur me këtë incident,
Vasili tha se nuk kishte asnjë dijeni për personin që kreu këtë veprim. 68-vjeçari është marrë në pyetje nga
policia dhe aty ka sqaruar motivet që e kanë shtyrë të ndërmarrë këtë veprim.
Burime nga policia kanë bërë të ditur se Gjyzeli e kreu veprimin në shenjë
hakmarrje ndaj prishjes që iu bë një lokali, biznes i familjes së tyre në vitin
2004-2005. Ai akuzoi politikën për shkatërrimin e lokalit e si rrjedhojë,
ekonomisë së familjes. Pas 8 orësh ai është lënë i lirë dhe po ndiqet
penalisht në gjendje të lire. Sipas policisë, Gjyzeli e kreu veprimin në
kushtet e një gjendje të rëndë depresive. Ndërsa pothuajse për të njëjtat arsye
është qëlluar edhe kryebashkiaku i Pogradecit me gurë. Normal që njerëzve iu ka
ardhur në majë të hundës, prandaj shprehen me gurë e me vezë. Dikush do të
thoshte, se kjo është rritje e nivelit të demokracisë. Po, ashtu është; kush
guxonte më parë të kundërshtonte... por edhe që na ka ardhur në majë të hundës
na ka ardhur.
Furgonat, sindikalistët protestojnë para Kuvendit
Ashtu siç ishte paralajmëruar shoferët e taksive 8+1 janë mbledhur para
godinës së Kuvendit të Shqipërisë për të protestuar ndaj vendimit për
mosmarrjen e pasagjerëve në kthim. Protestuesit mbanin në duar karafila të
bardhë, si simbol që protesta është paqësore dhe kërkojnë tryezë bisedimi me
përfaqësues të shtetit. Kreu i Bashkimit të Sindikave Gëzim Kalaja e konsideroi
anulimin e seancës plenare që ishte parashikuar për ditën e enjte si një veprim
të pa precedentë. “E pa
precedente që deputetët të tremben të mbyllin parlamentin të anulojnë seancën
plenare. Sot në duart tona ndodhen karafilat e bardhë nuk ndodhen, as bombat as
tritoli që ka pushtuar Shqipërinë. Ne nuk jemi kriminelë jemi njerëz paqësore.
Kërkojmë dialogun social në tavolinën e bisedimeve. 35 ditë nga protesta kemi
pasur mbështetjen e sindikatave. Ju keni marrë kredi, keni marrë borxhe, ju
keni votuar në 23 qershor për ditë më të mira. Deputetët e parlamentit shqiptar
duhet të ishin takuar me ju dhe të dëgjonin kërkesat tuaja dhe sot Parlamenti
Shqiptar duhet ta kishte kthyer seancën parlamentare, edhe në qoftë se nuk do të
kishte Kuvend.”- u shpreh Kalaja. Kreu i Bashkimit të Sindikatave ka theksuar
se një nga kërkesat e protestuesve është ndryshimi i ligjit të vitit 1998 për
taksitë. Ai theksoi se për kërkesat e protestuesve janë vënë në dijeni
edhe krerët e grupeve parlamentare. Kalaja kërkoi që shoferëve të taksive 8+1 t’u
lihej kohë para se të zbatohej urdhri i ministrit Haxhinasto. Me sa duket
qeveria dhe ministria ka vendosur të mos tërhiqet, dhe të fusi një shërbim
alternativ urbanësh. Kur hiqet diçka patjetër që do të zëvendësohet me diçka
tjetër, se nuk mund të lihet bosh vendi ashtu kot. Tashti Sindikalistët dhe
shoferët do të mendohen dy herë para se të votojnë përsëri.
Mjekët refuzojnë mjekimin, 2 fëmijë talasemikë
protestojnë para spitalit
Dy fëmijë talasemikë, së bashku me babain e tyre, kanë protestuar para
spitalit të Vlorës , pasi mjekët e këtij spitali iu kanë refuzuar mjekimin e dy
të miturve, pavarësisht urdhrit të Ministrisë së Shëndetësisë. Babai i dy fëmijëve Thimi Mino akuzon
bluzat e bardha në Vlorë, që sipas tij, jo se nuk munden, por nuk duan të
marrin përsipër trajtimin e dy fëmijëve përmes transfuzionit të gjakut. Një
procedurë e nevojshme kjo për jetesën normale të vogëlushëve. “Më kanë ofenduar, më kanë thënë dhe i
çmendur dhe psiqik. Dhe për ketë denoncoj fort dhe për këta dy foshnje dhe nuk
i ndahem këtij denoncimi që kam bërë deri në fund; derisa këta mjekë të marrin
atë që meritojnë. Kam vajtur në Ministrinë e Shëndetësisë ku më kanë dhënë një
shkresë. Dhe me këtë shkresë përsëri, drejtoresha e spitalit ka thënë nuk dua
të di fare as për të, merre dhe batanijen shtrihu aty natë ditë, këtu nuk do
kurohen më fëmijët e tu.”- deklaroi Mino. Por
shefi i pavijonit të pediatrisë në Vlorë, Fatmir Brahimaj shprehet, se
mundësitë e spitalit të këtij qyteti janë të kufizuara. Kjo dhe për faktin se
njëri prej fëmijëve reagon keq fizikisht gjatë transfuzionit, duke pësuar
reaksion. “Rasti është kompleks
sepse janë dy fëmijë dhe kuptohet kanë vështirësi për trajtimin e tyre. Për
këtë është filluar trajtimi këtu në spitalin tonë ku dhe janë diagnostikuar.
Kemi mundur që të marrim masën eritrocitare, pra rruazat e kuqe të gjakut për
t’ja transfuzuar këtu në spitalin tonë. Por tani ka filluar gjaku ka dhënë
reaksion dhe mjekët për vështirësitë që paraqesin kanë firmosur një dokument ku
thonë që nuk mund të marrin përsipër një rast të tillë. ”- u shpreh Brahimaj. Mjeku Brahimaj përdor si argument dhe
një urdhër që sipas tij ka ardhur nga Banka Qendrore e Gjakut, sipas të cilit
dy fëmijët duhet të trajtohen në mënyrë të specializuar. Prindi i dy fëmijëve, pak ditë më parë
ka regjistruar dhe një kallëzim penal në ngarkim të mjekes që kryen
transfuzionin, duke e akuzuar për neglizhencë. Një tragjedi e vërtetë kur
e dëgjon. Sistemi spitalor le shumë për të dëshiruar. Mjekët japin arsyet pse
nuk ndihmojnë, por nuk iu japin drejtim pacientëve...
Revokohen 121 leje minerare, Ministria e
Energjisë: Nuk kanë përmbushur detyrimet
Përfundimi i afateve të lejeve fillestare, apo moszbatimi i kërkesave për
lejet dhe detyrimet financiare nga shteti, ka bërë që Ministria e Energjisë dhe
Industrisë të revokojë 121 leje minerare. Vendimi ka ardhur pas urdhrit të
ministrit Damian Gjiknuri për të kontrolluar subjektet që janë pajisur me leje
për zhvillimin e aktivitetit minerar. Gjatë
këtij auditi, krahas subjekteve të cilat zhvillojnë aktivitet minerar në zbatim
të kërkesave ligjore, janë evidentuar edhe disa subjekte të tjera, të cilat
megjithëse janë pajisur me leje minerare të rregullta, nuk zbatojnë me
korrektësi kërkesat për lejet minerare që kanë në zotërim dhe detyrimet
financiare ndaj shtetit. Kështu
ministri Gjiknuri ka firmosur fillimin e procedurave për revokimin e 121 lejeve
minerare, që përbëjnë rreth 16% të totalit të lejeve të lëshuara, ndërsa për
disa të tjera janë vendosur penalizime me gjoba. Një pjesë tjetër e subjekteve
rezultojnë të zhvillojnë aktivitet të rregullt minerar, por nuk janë korrekt me
pagesat e garancive për zhvillimin e këtij aktiviteti. Ndërsa një tjetër
kategori subjektesh janë konstatuar se zhvillojnë aktivitet minerar në zona të
mbrojtura mjedisore dhe që u ka mbaruar afati fillestar i lejes. Këto subjekte,
megjithëse kanë kërkuar zgjatjen e afatit të lejes, kjo nuk është pranuar nga
Ministria e Energjisë dhe Industrisë, pasi në zonën e licencuar nuk lejohet
aktiviteti minerar. Ministria e
Energjisë dhe Industrisë do të vazhdojë procedimin e auditimit edhe për
subjektet që veprojnë në minierat e bitumit dhe bakrit. Tashmë sindikatave
iu është rritur volumi i punës dhe kanë arsye për të protestuar përsëri. Deri
tashti kemi dëgjuar vetëm penalizime dhe sindikatat nuk duhet të heshtin...
7 Marsi festohet në të gjithë vendin -Urime e dhurata për mësuesit
Lulet kanë qenë dhurata më e preferuar në këtë ditë të
veçantë të festës së mësuesit, 7 Mars, por nuk kanë munguar as dhuratat
materiale. Vetë prindërit shprehen se dhuratat janë më e pakta që ata mund të
bëjnë për të shprehur mirënjohjen për ata që u japin dije fëmijëve të
tyre. Ndërkohë që kjo ka qenë një ditë e mbarë edhe për shitësit e
luleve, të cilët kanë “pushtuar” hyrjet e shkollave në të gjithë vendin. Ministrja
e Arsimit Lindita Nikolla ishte në Elbasan, për të përcjellë urimet e saj, por
edhe për vizituar Drejtorinë Arsimore të këtij qyteti me rastin e 100 vjetorit
të krijimit të saj. "Përulem me respekt përpara arsimtarëve elbasanas,
sepse ky qytet është djepi i arsimit kombëtar. Elbasani i ka dhënë 3 kryetarë
Akademisë së Shkencave të vendit tonë dhe prandaj ndjehem krenare sot"-
tha Nikolla. Më tej ajo shtoi se, " për 6 muaj të qeverisë Rama arsimi ka
sot një mekanizëm rregullator midis mësuesve, prindërve dhe rektoratit. Ne kemi
rritur rrogat për 40 mijë mësues dhe i kemi ulur taksat, pra mësuesi sot
ndjehet më i vlerësuar dhe më i paguar". Një ditë më parë ministrja e
Arsimit, e cila ndodhej për një vizitë zyrtare në shtetin helen, ka takuar
mësuesit shqiptarë që japin mësimin plotësues të gjuhës shqipe falas për
fëmijët e emigrantëve shqiptar, që punojnë e jetojnë në Greqi. Nuk mund
ta harrojë mësuesin e parë kushdo prej nesh. Tashmë pretendimet për dhurata
janë rritur, si nga mësuesit, po ashtu edhe nga nxënësit që ua dhurojnë. Një
lule është thjesht diçka simbolike...
Arvizu darkon me Donald Lu në Uashington, i tregon Shqipërinë
Ambasadori i ri i SHBA-së Donald Lu po vjen në Shqipëri më
së fundi. Aleksandër Arvizu ka publikuar një foto në facebook, ku ai po darkon
me diplomatin Donald Lu, i cili është edhe ambasadori i ardhshëm i Shteteve të
Bashkuara në Shqipëri. Darka në Uashington tregon se largimi i Arvizusë nga
Shqipëria është çështje ditësh. Darka do të ketë shërbyer si mundësi për t'i
përcjellë pasardhësit të tij situatën politiko-ekonomike në Shqipëri, por
dhe këshillat si të sillet me krerët e politikës shqiptare duke u mbështetur
tek eksperienca e tij në Shqipëri. Shpresojmë që t’i ketë dhënë këshilla të
vlefshme pasardhësit të vet, se ai vetë ka pasur shumë telashe në këto vite të
mandatit të tij.
Mblidhet Këshilli Kombëtar i Librit -2014 shpallet viti i De Radës
Në ambientet e Ministrisë së Kulturës u mblodh për herë
të parë që nga viti 2008, Këshilli Kombëtar i Librit. Gjatë mbledhjes u përkrah
ideja e shpalljes së vitit të De Radës dhe përgatitjes së veprës nga studiues
dhe autorët arbëreshë. Të pranishëm në këtë mbledhje ishin Ministrja Mirela
Kumbaro, anëtarë të shtëpive botuese dhe autorë e përkthyes të librit në vendin
tonë. Në fjalën e saj ministrja Kumbaro, theksoi rëndësinë e mbledhjes së
këtij Këshilli, si një organ këshillimor i rëndësishëm i dikasterit që ajo
drejton. “Ka gati më shumë se dy vjet që Këshilli Kombëtar i Librit nuk
është mbledhur. Unë besoj se çdo ministër ka nevojë, por edhe detyrë të
këshillohet e të shkëmbejë mendime me komunitetin e fushave me të cilat lidhen
vendimmarrjet e ministrisë”, tha Kumbaro. Ndër të tjera zonja Kumbaro
shtoi se Ministria e Kulturës ka për qëllim të mbështesë edhe financiarisht
autorët për të shtuar larminë e librave për lexuesin. “Në politikën që
duam të zhvillojmë, duam të krijojmë më shumë hapësira për të mbështetur
krijuesit ku pa më të voglin dyshim përfshijmë autorët njësoj si dhe
përkthyesit. Duke promovuar mendimin krijues, debatin, edukatën e leximit, jo
vetëm kryejmë detyrën tonë në politikat edukuese të publikut, por ndihmojmë
edhe krijuesit sepse u shtojmë lexuesit, por edhe botuesit sepse u shtojmë
klientët”,- përfundoi Ministrja Kumbaro. Ndërkaq, me rastin e vitit të De
Radës, propozime të shumta për aktivitete u lanë të hapura që të shqyrtohen në
mbledhjet e radhës. Në jetën kulturore të njeriut libri zë një vend të rëndësishëm.
Shtimi i titujve të botuar e ndihmon politikën e librit. Subvencionimi i
titujve shkon në favor të xhepave të botuesve të mëdhenj, që njëkohësisht janë
edhe drejtuesit e shoqatave të botuesve. Ndërkaq politika më e mirë do të ishin
fushatat sensibilizuese në favor të leximit, se po na shtohen analfabetët
funksionalë, që merren me FCB dhe e kanë të vështirë të lexojnë qoftë edhe një
gazetë...
Hallet e librit nuk janë vetëm të javës që iku. Libri është
shoku më i mirë i kujtdo. Një këshillë pa rezerva të nderuar dëgjues. Libri nuk
gjendet vetëm në libraritë ku shitet, por edhe në bibliotekat publike. Mund t’i
drejtoheni normalisht atyre. Le të kujtojmë këtu kohën kur shkëmbenim libra me
njëri tjetrin. Përpara një filxhani çaji apo kafeje të mirë mund të bëhet
muhabet shumë mirë, por edhe mund të merret një libër me rrëfime dhe studentët
mund të lexojnë librat e shkollës më mirë. Koha është po ajo, libri mbetet
libër dhe nevoja për të lexuar e për t’u ndriçuar është po ajo. Po e risjell në
vëmendje edhe një herë këshillën e Rilindasit Naim Frashëri – dhe dritë e
diturisë përpara do të na shpjerë. Mos harroni dhe qëndroni me programet tona të
ALBANIA FM radios, ku vazhdimisht do të gjeni prehje dhe këshilla të vlefshme.
Këto ishin ato që kisha veçuar për ju të nderuar dëgjues, besoj se hallet tuaja
janë edhe hallet tona. Le të shpresojmë për mirë në ditët në vijim. E lusim
Zotin t’ju japë një javë më të mirë dhe deri të shtunën tjetër mirë u
dëgjofshim e selam alejkum nga Roald Hysa dhe stafi i radios tonë.
Comments
Post a Comment