Sefer Daja
Sefer Daja, agjitatori komunist dhe Nata e mirë
Sefer Daja ka qenë një
nga figurat më të mirënjohura të Tiranës së viteve 1960-1970. Ai ka qenë një
bejtexhi me aftësi thumbuese, e sidomos ndaj atyre që tregoheshin mendjemëdhenj
me atë pak pushtet që kishin. Për arsye të ndryshme ai përfundoi si punonjës i
banjove publike deri sa vdiq. Mirëpo ka mbetur në kujtesën e të gjithë bashkëkohësve
si bejtexhi thumbues e hazër-xhevap.
Një agjitator i regjimit
komunist kundër zakoneve prapanike, sic njiheshin asokohe të gjitha traditat
popullore, dhe që thjesht merrte rrogën në Komitetin Qendror të Partisë shkoi
një ditë në mëngjes për të urinuar të banjot ku punonte Sefer Daja. Mbrëmja e
asaj dite ishte Natë e Mirë, por për kohën kur flitej ishin të ndaluara nga
regjimi jo vetëm festat fetare si Bajram e Pashkë, Netë të mira, Ramazani, por
edhe vetë feja. Nuk mund të përmendje asnjë festë fetare, mbasi quheshe i
prapambetur, por edhe mund të dënoheshe po të merreshe me to. Ky agjitatori tek
po urinonte iu kthye Seferit, që ishte i ulur në minderin e tij dhe po
mendohej:
-Agjëron more? Agjëron apo
jo?
Seferi që nuk e priste këtë
pyetje u habit!
-Çere? Çere thu mre
jahu, se nuk po të mor vesht?
-Të pyeta a agjëron, së
sonte është Natë e Mirë?
-Hik mre jahu anej, ene
tina, se s’kemi ça me vu në sofër, tip o na thu a agjëron! Le po janë lonë tashti
këto zakone!
-Ah… ç’jeni ju pleqt e
Tiranës, kështu thoni ju, por mbas shpinës, në shtëpi nuk e leni pa e bërë një çikë
hallvë, për t’i kujtuar këto zakone prapanike.
-Jo mor jahu, ta thashë
që s’kemi ça me
vu në sofër, jo mo të bojmë hallvë e ç’thu tina. Janë lonë kto gjona tashti.
-Jo, se Partia na thotë
se zakonet prapanike bëhen pengesë për jetën tonë. E pse atëherë duhet t’i
ndjekim ne?
Seferi mezi po e duronte
propagandën e tij monotone e të mërzitshme, por ai vazhdonte përsëri me të tijën.
Jo, si duhet t’i luftojmë zakonet prapanike, jo se duhet t’i përgjigjemi
thirrjes së Partisë në këto raste etj.
Seferi e la te
llomotiste agjitatorin sa deshi ai vetë dhe në një moment iu kthye me vargjet e
tij. Agjitatori u turpërua me vargjet që dëgjoi e që i dëgjuan edhe të tjerët që
ishin të pranishëm aty, dhe doli me nxitim të madh pa u përshëndetur fare:
Sonte qenka Nota e Mirë
Hallv nuk bojmë, s’kemi sheqer.
Vetëm muti osht i lirë,
Shko merr tasin e hajde merr...
Comments
Post a Comment