Java në një ditë –ALBANIA FM 24 maj 2014
Java në një ditë – 24 maj 2014
Selam alejkum të nderuar dëgjues të
ALBANIA FM radio nga unë Roald Hysa në këtë të shtunë të parafundit të majit. Tashmë
temperaturat e motit janë ngritur dhe vapa ka filluar zyrtarisht duke na
sinjalizuar hyrjen e verës, stinës së nxehtë shumë të preferuar nga Shqiptarët.
Në këtë javë si edhe në javët e kaluara politika ka vazhduar të luajë rolin e
vet kryesor me protagonizmin e saj, por nuk duhet të harrojmë se politika është
vetë jeta e jonë e përditshme. Droga dhe opozita shqiptare janë fjalët më të
klikuara të kësaj jave. Lajmet e kapjes së sasive të ndryshme droge kanë qenë të
shumta dhe në fokusin e agjencive të lajmeve, duke i dhënë argumente më shumë opozitës,
e cila e ka emërtuar qeverinë Rama, qeveria e narkotrafikut. Batutat dhe kundërbatutat
npër mediat e ndryshme janë shkëmbyer pa rezerva nëpër mediat e ndryshme nga të
dyja palët kryesore të politikës së sotme. Gjithsesi asnjëra nga palët nuk ka lëvizur
nga pozicioni i vet, qeveria Rama nuk e ka dhënë dorëheqjen, kurse partia demokratike
vazhdon të jetë në opozitë. Retorika të ashpra e fyese të pozitës nga një anë
dhe etiketime politike përkeqësuese nga ana tjetër. 16 njerëz kanë hyrë në një
grevë urie për të kërkuar të rikthehen në vendet e tyre të punës, por nuk duket
se do të rikthehen atje ku kanë qenë, megjithëse i kanë fituar gjyqet për t’u
rikthyer në vendet e tyre të punës. Ndoshta sakrifica e këtyre njerëzve nuk
shkon kot, sepse kjo qeverisje nuk ka ndërmend t’i kthejë aty ku kanë qenë. Në gjithë
këtë gurgule mediatike e politike së bashku qeverisja qahet se do ta humbasë
shnasin për të hyrë në Evropë për t’ia hedhur fajin e një humbjeje të mundshme opozitës,
duke harruar që është qeverisja ajo që i ka në dorë çelsat e zyrave qeveritare.
Opozita po merret me punën e vet, të cilën deri tashti e ka kryer shumë mirë. Ajo
që vazhdon të tronditi opinionin publik është krimi në familje. Nëna nuk di të
komunikojë me vajzën e vet dhe me dashje vret pjellën e vet, për të cilën është
munduar 9 muaj dhe e ka rritur me sakrifica. Jeta është e mbushur me sakrifica
të jetës së përditshme dhe ne nuk duhet ta hedhimn poshtë kaq kollaj një jetë njerëzore,
një femër që vret një femër, një nënë që vret një nënë potenciale, kjo është një
tragjedi e kohëve moderne. Ndërkaq një grup intelektualësh kanë bërë një
thirrje në favor të familjes nëpërmjet një letre publike “Familje e shëndoshë-
Atdhe i shëndoshë”, një thirrje kjo për të ruajtur familjen edhe nga këto lloj
problemesh, por të vetmit që kanë reaguar kundër kanë qenë Lëvizja LGBT. Java e
shkuar pati shumë probleme shqetësuese, por le të merremi me disa prej tyre në
emisionin tonë të sotëm
Tatimet: Të ardhurat në janar-prill 2014, mblidhen
mbi 5 mld lekë më shumë
Drejtoria e Përgjithshme e Tatimeve publikoi realizimin e mbledhjes së të
ardhurave për muajin prill 2014 dhe 4-mujorin, duke theksuar se “për muajin
prill 2014, si dhe për 4-mujorin, Administrata Tatimore arriti tregues të lartë
në mbledhjen e të ardhurave, në përmbushje të detyrave të ngarkuara dhe
programit të Qeverisë Shqiptare”. Sipas
njoftimit për shtyp të Drejtorisë së Tatimeve, “Totali i të ardhurave të
mbledhura për muajin prill është 14 miliardë e 849 milionë lekë, dhe krahasuar
me të njëjtën periudhë të vitit të kaluar kjo shifër, e mbledhur fakt, është
1.6 miliardë lekë më shumë ose një rritje prej 12.34%”. Sipas zërave kryesorë
të të ardhurave të mbledhura rezulton se Kontribute të Sigurimeve Shoqërore,
Drejtoria e Tatimeve thekson se, “janë mbledhur 5 miliardë e 933 milionë lekë
ose 662 milionë lekë më shumë se muaji prill 2013, duke realizuar një rritje
prej 12.57 % më shumë se kjo periudhë e mëparshme”. TVSH, janë mbledhur 3 miliardë e 164
milionë lekë ose rreth 376 milionë lekë më shumë se muaji mars 2013. E shprehur
në % kjo shifër është 13.48% më shumë se e njëjta periudhë e vitit të kaluar. Tatim mbi Fitimin, gjatë muajit prill
janë mbledhur 1miliard e 618 milionë lekë, 50.6% më shumë ose rreth 543 milionë
lekë më shumë se muaji prill 2013. Krahasuar
me periudhën 4-mujore janar – prill të vitit 2013, të ardhurat e mbledhur në
total gjatë muajve janar – prill 2014, janë 57 miliardë e 139 milionë lekë, 9.7
% ose mbi 5 miliardë lekë më shumë se janar – prill 2013. Shumë shifra kishte ky lajm si për të na thënë se ne e kemi marrë seriozisht këtë
punën e taksave. Arritje të mëdha në të gjitha fushat, ky është i gjithë pikësynimi
i këti lajmi dhe i shumë të tjerëve që vijnë nga qeveria, porse ajo që të len
një shije shumë të hidhur në gojë është se kjo të kujton realizimin e planit
dhe tejkalimin e tij që synohej dhe jepej me bujë nëpër media gjatë kohës së
regjimit monist.
Itali, bllokohen 1450 kg marijuanë nga Shqipëria,
në pranga tre italianë
Policia italiane ka sekuestruar në Katania 1450 kilogramë marijuanë, e cila
ishte transportuar nga Shqipëria me anë të një peshkarexhe. Pas
operacionit të policisë, janë arrestuar tre italianë Joseph Costanzo 51 vjeç ,
Sebastiano Costanzo 52 vjeç dhe Sandro Mirabella 45 vjeç, si përgjegjës për transportin
e drogës të fshehur në peshkarexhë. Sasia e madhe drogës ishte shpërndarë
në disa pako të mbështjella me celofon dhe ishte vendosur pranë motorit të
peshkarexhës. Kjo e fundit ka përshkruar rrugën nëpërmjet detit Jon dhe
sipas hetuesve italianë, besohet se ka transportuar drogë edhe herë të tjera.
Mediat italiane bëjnë të ditur se vlera e drogës së sekuestruar kësaj here
është rreth 6 milionë euro. Lajme të ndryshme po na pohojnë se droga drejt
Italisë po niset me të gjitha mënyrat e mundshme, çka tregon një përshkallëzim
të përpjekjeve të narko-trafikuesve jo vetëm për të transportuar drogë në sasi
të mëdha, por edhe me të gjitha mënyrat e mundshme nga toka, ajri apo deti. Një
gjë është e sigurtë, makutëria e këtyre njerëzve nuk merr fund kollaj. Përjekjet
e tyre nuk do të reshtin, madje edhe në këto momente kur ne po flasim.
Të larguarit nga puna grevë në çadra:
Ja 5 kërkesat
Të larguarit nga administrata vijojnë prej pasdites së djeshme grevën e
urisë në tendat e vendosura pranë selisë së Kryeministrisë, në lulishten
përballë Piramidës. Dhjetë grevistët e parë, pjesë e shoqatës së të larguarve
nga puna, janë gdhirë në çadra, ndërsa në mbështetje të tyre kanë qenë edhe
deputetët e PD-së, Gerti Bogdani, Aldo Bumçi dhe Keltis Kruja. Më pas atyre iu janë bashkuar edhe 4 të tjerë.
Grevistët kanë paralajmëruar pjesëmarrje të gjerë në grevë, dhe
pikërisht rreth orës 10:00 katër punonjës të tjerë të larguar nga puna i
janë bashkuar çadrave ku po zhvillohet greva, duke e çuar në 14 numrin e
grevistëve. Mësohet se katër personat që iu bashkuan grevës nuk janë pjesë e
shoqatës së të larguarve nga puna. Ata janë: Sokol Ukperaj, ish-ekonomist te
Sigurimet Shoqërore, Edmond Idrizi, ish- kryeinspektor te Drejtoria e Burgjeve,
Mehmet Cemurati, ish-gardist dhe Mimoza Boçari, mjeke. Të larguarit nga puna, pjesë e grevës
së urisë, kanë parashtruar pesë kërkesat e tyre ndaj qeverisë. Ata
kërkojnë që të zbatohen vendimet e gjykatës për t'u rikthyer në punë, vendime
për të cilat ata pretendojnë se nuk janë zbatuar ende. Grevistët kërkojnë të
bëhet transparenca e numrit të të shkarkuarve nga puna dhe marrjen e
përgjegjësive për trajtimin e legjislacionit të administratës. Ndërkohë autoriteti shëndetësor ka
vënë në dispozicion të grevës një ekip mjekësor dhe një ambulancë vijon të
qëndrojë pranë grevistëve. Dy mjekë kanë kryer kontrolle sa i takon gjendjes
shëndetësore të grevistëve. Për të inspektuar nga afër gjendjen e grevistëve,
kanë shkuar dhe përfaqësues të Institucionit të Avokatit të
Popullit. Grevistët janë vizituar dhe nga deputetet e Partisë Demokratike,
Albana Vokshi dhe Mesila Doda. Përveç vizitave zyrtare, grevistët janë vizituar
dhe nga familjarët e tyre. Të jesh papunë sot është me të vërtetë e vështirë,
dhe nuk është habi që këto njerëz protestojnë. Njerëzit duhet ta mendojnë që
sektori privat është një alternativë më e mirë se ai shtetëror. Por edhe drejtësia
duhet rikthyer në vend. Gjykata ka vendosur në favor të këtyre njerëzve dhe këta
njerëz nuk duhet të marrin justifikime klasore për moskthimin e tyre në vendin
e punës.
Vajza tenton të shkojë në ekskursion, nëna e
vret me armë, më pas vetëvritet
Dëshira për të shkuar me bashkëmoshatarët në një ekskursion të organizuar
nga shkolla, e ka bërë 15-vjeçaren Sara Keqi që të kundërshtojë nënën, duke
tentuar të nisej pa lejen e saj. Por ky kundërshtim i ka kushtuar asaj jetën,
pasi e ëma e ka qëlluar me armë zjarri, duke e lënë të vdekur në oborrin e
shtëpisë. Ngjarja e rëndë
ka ndodhur në fshatin Fushë Kuqe të Kurbinit, ku 40-vjeçarja Mimoza Keqi ka
vrarë me armë zjarri të bijën 15-vjeçare, dhe më pas është vetëvrarë me të
njëjtën armë. Sipas
dëshmive nga vendi i ngjarjes, nënë e bijë kanë debatuar ashpër që prej
mbrëmjes e deri në mëngjesin e ditës fatale, pasi 15-vjeçarja ka kërkuar të
shkonte në ekskursion me klasën. Në përpjekje për të bindur të bijën, që
kërkonte me çdo kusht të nisej për në ekskursion, gruaja ka marrë një armë
zjarri dhe ka shtënë në drejtim të vajzës. Mësohet se 40-vjeçarja
fillimisht e ka plagosur të bijën, dhe kur ajo ka dalë në oborr e ka qëlluar
sërish me breshëri automatiku, duke e lënë të vdekur. Pasi ka parë vajzën të
mbytur në gjak, në kushte të rënda psikologjike, 40-vjeçarja është futur në
banesë dhe i ka dhënë fund jetës me të njëjtën armë. Mësohet se në momentin e
ngjarjes nënë e bijë ishin vetëm në shtëpi. Ndërkohë Policia e
Kurbinit ka mbërritur menjëherë në fshatin Fushë Kuqe dhe po punon për të
zbardhur ngjarjen. Tashmë policisë
nuk i ka mbetur gjë tjetër vetëm që të evidentojë rastin, sepse ajo që u bë, u
bë. Tashmë i takon shoqërisë tonë të reflektojë e të veprojë. Familja po dëmtohet,
sepse kjo shoqëri po prodhon prindër të pandërgjegjshëm dhe mungesa e arsimimit
sjell gjithashtu ashpërsimin e marrëdhënieve ndër-njerëzore. Nëna që vret bijën
e saj, një kandidate për nënë. Kjo është thjesht tragjike...
Opozita në shesh, Basha: Rama ndihmës i
narkotrafikut, vendi ka nevojë për zot shtëpie
Qytetarë të shumtë nga të gjitha qytetet e vendit iu bashkuan protestës
paqësore të opozitës, në sheshin përpara godinës së Kryeministrisë, ku kërkuan
largimin e kryeministrit Rama. Ashtu siç ishte paralajmëruar, marshimi opozitar
nga sheshi “Skënderbej” ka nisur rreth orës 11:00 me parullën: “Një popull në
këmbë kundër drogës, Rama në shtëpi”. Pas
marshimit paqësor përgjatë Bulevardit “Dëshmorët e Kombit”, të kryesuar nga
deputetët e PD-së, protestuesve ju bashkua edhe kryetari i demokratëve, Lulzim
Basha dhe ish-kryeministri Sali Berisha. Ndërkohë protestuesit mbanin në
duar parulla të njëjta me ato të një jave më parë, që u hodhën përpara
Parlamentit: “Shqipëria drejt Europës, jo drejt Kolumbisë”; “Ikni në shtëpi, ju
s’na jepni siguri”; “Integrim, jo drogë”. Përballë protestuesve, në
godinën e Kryeministrisë qëndronte një kordon policie, i përbërë kryesisht
nga efektive femra. Ashtu sikundër u paralajmërua nga takimi i pak
ditëve më parë i kreut të demokratëve me aleatët, në këtë protestë ishin të
pranishëm edhe kreu i Partisë Republikane, Fatmir Mediu dhe kreu i PDK, Nard
Ndoka. Pas fjalës së
kryetarit të PD-së, i cili kërkoi dorëheqjen e Kryeministrit Rama, protestuesit
janë shpërndarë qetësisht, ndërsa një pjesë e tyre kanë shprehur
solidaritet me grevistët e urisë, që qëndrojnë prej tre ditësh në çadrat e
ngritura pranë kryeministrisë. 16 grevistët e urisë, pjesë e shoqatës së të
larguarve nga administrata, kërkojnë rikthimin në punë. Ky ishte
mitingu i dytë i opozitës së kryesuar nga partia demokratike, ku njerëzit u
larguan qetësisht për në punën e tyre. E pra, partia demokratike po jep mesazhe
pozitive në këtë drejtim, krejt në të kundërt të atij mitingu fatkeq të partisë
socialiste më 21 janar, ku humbën jetën katër persona. Mesazhi i opozitës së
sotme drejtuar të gjithë opinionit publik vendas e të huaj është i njëjtë: ne luajmë
sipas rregullave të vendosura nga ky sistem, ndërsa ju nuk po luani. Ata që e
njohin politikën e kanë marrë këtë mesazh, i cili është krejtësisht i dukshëm
dhe i prekshëm. Lufta në parlament dhe në sheshet publike është brenda krejt
rregullave të demokracisë. Ndërkaq qeverisja qasjen ndaj lojës demokratike e ka
krejt selektive. E përkthyer në terma popullore, lojën e demokracisë e pranon
aty ku i leverdis, e aty ku nuk i leverdis, JO...
SHËNIMI I JAVËS –
Vrasja e
një vajze nga nëna e vet dhe më pas vetëvrasja e kësaj të fundit me të njëjtën
armë me të cilën vrau të bijën është e denjë për një skenar tragjik të një
filmi horror, i zhvilluar brenda 12 orëve. Po të hysh në thellësi të kësaj ngjarje
fatkeqe mund të bëhen studime të fushave të ndryshme, të cilat do të sillnin në
vëmendjen tonë vetëm një gjë; rritjen e kriminalitetit, të abuzimit, të dhunës
në familje. Qasjet ndaj këtij problemi mund të vijnë nga disa anë, si fjala
vjen ekonomike, sociale, të komunikimit, të mbarëvajtjes etj. Një nënë që vret vajzën
e vet, një kandidate potenciale për vazhdimësinë e jetës dhe të familjes është
një mesazh negativ, një dhimbje e pafund për të gjithë të afërmit e tyre. Tronditja
e farefisit të këtyre dy femrave ka qenë e jashtëzakonshme. Për vite me radhë
nuk do të shlyhet nga kujtesa kjo tragjedi e hidhur me shumë pasoja. Ka ardhur
koha që të mos merren vetëm forcat e rendit duke evidentuar thjesht rastin dhe
duke futur një numër në statistikat e kriminalitetit brenda familjes. Studiuesit
duhet të thonë fjalën e vet, psikologët gjithashtu. Sociologët duhet të
angazhohen me punën e tyre konkrete në terren dhe e gjithë shoqëria civile
duhet të reagojë në mbrojtje të vlerave njerëzore, në mbrojtje të familjes. Dy femra
u larguan nga kjo botë duke na dhënë secila mesazhe të kundërta. Njëra që ndërpreu
jetën e vajzës së saj me dhunë, dhe vajza që kërkonte të dilte e të shihte botën
përreth, por që nuk doli se nuk e lanë. Të dyja këto femra u larguan me shumë
peng nga kjo botë dhe duke i lënë të habitur e të tronditur ata. Çfarë kuptimi
kishte veprimi i kësaj nëne, e cila nuk arriti të gjejë një zgjidhje paqësore me
bijën e vet? Kjo tregon që ato të dyja nuk ditën të komunikojnë me njëra-tjetrën.
Moskomunikimi i rregullt nuk mund të rregullohet brenda një nate dhe ndodh ajo
që ndodhi. Komunikimi brenda familjes është shumë i rëndësishëm dhe kjo gjë
arrihet duke e plotësuar këtë boshllëk me dashuri e mëshirë ndaj fëmijës. Ndoshta
ajo nënë nuk ka pasur aq para sa ta dërgonte vajzën e vet në ekskursion. Por këtë
mungesë ajo duhet ta kishte plotësuar me dashurinë dhe mëshirën që ndjen çdo nënë
për fëmijën e vet. Prindi duhet të tregojë autoritet, por njëkohësisht edhe mirëkuptim
ndaj nevojave të fëmijës. Fëmija duhet mësuar që të tregojë respekt ndaj
prindit dhe autoritetit, gjëra që do t’i nevojiten fëmijës për vitet në vijim. Por
ajo që shohim rëndom si shfaqje publike npër mediat e lajmet që na vijnë nga të
gjitha agjencitë, është mungesa e mëshirës, tolerancës, dashamirësisë e ajo që
të vret më tepër është varfëria. Jo thjesht një varfëri ekonomike apo
financiare, porse një varfëri shpirtërore e atillë, që po çon njerëzit në
vrasje e vetëvrasje. Shoqëria duhet të gjejë mjetet dhe mekanizmat për ta
ruajtur familjen dhe individin njëkohësisht. Një herë e një kohë ishte
kolektivi në qendër të vëmendjes së shtetit dhe shoqërisë, ndërsa sot kemi
kaluar në një shoqëri me fokus individin dhe egoizmin e tij për çdo gjë
materiale. Kjo ka sjellë një shpërqendrim të vëmendjes nga objekti. Na duhet të
gjejmë një të mesme të artë midis familjes dhe individit. Familja është një
institucion i rëndësishëm për të cilin ia vlen të ruhet e të luftohet. Familja dhe
qyteti janë dy nocione me të cilat shteti mund ta gjejë rrugën e zgjidhjes shumë
lehtë. Familja dhe fshati gjeografikisht po shohim se janë shumë larg qendrës së
vëmendjes së shtetit dhe ojf-ve të ndryshme që merren me veprimtari të ndryshme
dobiprurëse shoqërore. Kjo largësi duhet të shkurtohet në mentalitetin shoqëror
dhe praktik të jetës sonë sociale. Fshati po qëndron larg vëmendjes tonë të përgjithshme,
madje edhe rendi megjithëse është i pranishëm atje me ndonjë polic operativ, i
gjithë legjislacioni shtetëror nuk merr asnjë lloj vlere para traditës zakonore
dhe lidhjeve të gjakut që ka ky polic në atë fshat ku jeton. Jeta ka dhimbje
dhe këto dhimbje nuk do të na pushojnë deri në frymën e fundit në këtë botë. Vlerat tona të familjes kanë qenë gjithnjë ato që na kanë mbajtur të qëndrojmë
në këmbë me krenari e dinjitet. Ky ka qenë sekreti i qëndresës sonë në përballimin
e vështirësive dhe kështu ka për të qenë edhe në vazhdim. Familja është vlerë e
shenjtë, e paprekshme! Mbrojtja e këtyre vlerave është mbrojtja e nderit dhe
dinjitetit tonë shoqëror e kombëtar. Për këto gjëra ia vlen të jetosh e të
luftosh dhe për këtë njerëzit kanë nevojë për një mbështetje shpirtërore e
morale, e cila nuk ofrohet nga shteti. Këtë gjë nuk e ka bërë deri tashti as
shoqëria civile me shumë nga mekanizmat e saj. Ndërkaq komunitetet fetare janë
më të ndjeshme dhe përmbajnë brenda vetes së tyre mbështetjen morale dhe shpirtërore
për këtë institucion të rëndësishëm, shumë herë më tepër se sa çdolloj grupimi
tjetër shoqëror. Para pak ditësh një thirrje për të ruajtur familjen nga egoizmi
i tepruar individual e sjellë kjo nëpërmjet një letre të firmosur nga
intelektualë dhe figura të artit e të skenës u keqkuptua nga një grupim social,
si dhe nga shumë të tjerë, duke hapur kështu një debat që ka munguar prej kohësh.
Para se të shërojmë individin dhe familjen tonë ne duhet ta vendosim pikat mbi
I, dhe jo të tregojmë me kokëfortësi se kështu jemi dhe pikë. Shërimi shoqëror
nis nga shërimi shpirtëror, për këtë starti në çdolloj kohe e grupimi është njësoj
i vlefshëm.
Comments
Post a Comment