Java në një ditë ALBANIA FM 31 maj 2014
Java në një ditë
31 maj 2014
Të nderuar dëgjues të ALBANIA FM
radios selamu alejkum dhe mirë se erdhët në emisionin tim të përjavshëm Java në
një ditë. Unë jam Roald Hysa dhe së bashku kemi nisur një udhëtim që prej disa
kohësh, ku në qendër të vëmendjes kemi hallet dhe problemet e përditshme. Aktualiteti
i ngjarjeve të politikës dhe atyre shoqërore është tejet akut, dhe kjo javë nuk
bën përjashtim nga të tjerat. Niveli i ashpërsisë së përplasjeve politikë u
rrit përsëri me një grevë të re të ish-të dënuarve politikë, të cilët kërkojnë
të merren seriozisht nga qeverisja socialiste. Fillimi i grevës së urisë u shënua
me përplasje me policinë e shtetit, e cila u përpoq maksimalisht t’i ndalonte
ish-të dënuarit. Debate të ashpra u transferuan edhe në parlament, si dhe në
zyrat e kuvendit midis deputetëve demokratë e socialistë. Madje socialistët e
sulmuan fizikisht me të shtyra deputetin Strazimiri. Një pjesë e debatit social
në media u fokusua me komunitetin LGBT, të cilët me shumë agresivitet dhe pa
pushim duan të imponojnë axhendën e tyre politike zërave të shoqërisë civile. Ata
madje kanë atakuar edhe komunitetet fetare në vend përse këta dolën e u shprehën
pro familjes, duke iu kujtuar atyre se nuk mund të bëhen veprimtari me paratë e
shtetit pro familjes. Çfarë ironie një komunitet shumë i vogël e i papërfillshëm
në numra i kujton të mëdhenjve, që janë taksapaguesit kryesorë të këtij shteti
të mos shprehen pro familjes. Heshtni ju, kjo ka qenë mesazhi kryesor i
LGBT-ve. Ndërkaq një nga objektet e krenarisë tonë kombëtare Muzeu i Arsimit në
Korçë i mungojnë disa nga objektet origjinale, të cilat janë zhdukur
misteriozisht. E kaluara jonë po humbet pak nga pak për t’i lënë vend një
materializmi të vrazhdë. Familja dhe krimi brenda saj kanë qenë përsëri në vëmendjen
e agjencive të lajmeve edhe për këtë javë. Një baba vret vajzën pse ishte
shtatzanë që prej pesë muajsh nga një lidhje jo e ligjshme. Ndërkaq nëna që
vrau vajzën e vet adoleshente dhe më pas vrau veten javën e shkuar, dyshohen të
jenë vrarë nga dikush tjetër dhe janë paraqitur ndryshe për të humbur gjurmët vrasësit.
Ky është një lajm i mirë, me gjithë anën e vet tragjike të vrasjes. Përsëri jeta
vazhdon dhe njerëzit duan të ecin përpara. Kështu edhe ne po vazhdojmë me ato
lajme që kemi përzgjedhur për ju të nderuar dëgjues...
Shkolla e parë shqipe, ja si u zhdukën objektet
origjinale
Mungojnë objektet origjinale në Muzeun Kombëtar të Arsimit në Korçë. Në
ndërtesën ku sot ndodhet ky muze, ku në vitin 1887 u hap shkolla e parë shqipe
(njihej me emrin "Mësonjëtorja e Parë Shqipe"), elementët origjinalë
janë shumë të paktë për të mos thënë që janë inekzistentë. Drejtori i muzeut,
njëherazi historian dhe koleksionist i njohur, Niko Kotherja, në një intervistë
për mediat ka pohuar, se aktualisht nga e kaluara në këtë muze ekzistojnë vetëm
3 pllaka grafiti që shkruanin nxënësit e asaj kohe, ndërsa vetë ai ka shtuar
nga koleksionet e tij edhe lapsat origjinalë të tyre. Për herë të parë, ai bën
publik faktin që zhdukja e shumë prej objekteve origjinale nga ky muze lidhet
me qershorin e vitit 1902, kohë kur osmanët mbyllën shkollën shqipe dhe
arrestuan drejtuesit e saj. Ja se si e
shpjegon gjendjen e mjerueshme të muzeut drejtori Niko Kotherja: Natyrisht
që shumë prej objekteve origjinale në këtë muze mungojnë, por ne jemi duke bërë
përpjekje për rivitalizimin e këtij muzeu. Aktualisht objekte origjinale janë 3
pllaka grafiti, që përdoreshin për të shkruar nxënësit e asaj kohe. Muzeu
Kombëtar i Arsimit ngjall interes për shumë vizitorë dhe normalisht ne duam që
t'u përgjigjemi interesit të tyre. Aktualisht kemi një bashkëpunim me
bibliotekën e qytetit dhe kemi tërhequr plot 34 libra që i përkasin kohës së
fillimit të shkollës së parë shqipe. Bëhet fjalë për tekste të asaj kohe, të
shkruara nga nxënës të Mësonjëtores apo patriotë. Këta libra aktualisht gjenden
në këtë muze dhe mbartin shumë interes. Kemi krijuar një bibliotekë brenda
muzeut, fondi i së cilës deri tani ka arritur në 97 libra, që u përkasin
periudhave të ndryshme. Këto libra janë dhuruar dhe janë pjesë e fondit të
Muzeut Kombëtar të Arsimit. Por jo vetëm kaq, ne jemi duke krijuar një arkivë
dhe mediotekën. Pra, në këtë muze do të mund të gjenden edhe regjistrime audio
dhe filmime, duke filluar nga pamjet më të vjetra, përfshi dhe fasadën e
shkollës dhe imazhe të tjera. Ata që luftuan për një arsim kombëtar po iu
fshihet kontributi nga duar të errëta, që veprimtarinë e tyre kryesore e kanë
pasur pikërisht në këtë qytet. Vlerat historike të këtij qyteti po fshihen në
favor të disa përfitimeve materiale të disa arrivistëve, që synim kryesor kanë vetëm
arritjet e tyre. E kjo është e dhimbshme kur vlerat sulmohen nga anti-vlerat.
Myftinia merr tokën e tregut të Zdrales, 300
punonjësit në protestë
Njoftimi i pak ditëve më parë nga ana e Myftinisë së Shkodrës, se duhet të
lirohet sa më shpejt hapësira që shfrytëzohet nga 300 tregtarë, i ka ngritur
ata në protestë. Dhjetëra përfaqësues dolën para godinës së Myftinisë, duke
kërkuar që të mos lëvizen nga vendi ku kanë tregtuar për mbi 20 vjet, punë me
të cilën kanë mbajtur familjen. Tregu me prodhime industriale dhe ushqimesh ndodhet
para stadiumit “Loro Boriçi”, një prej më të mëdhenjve në Shkodër. Në tetor të vitit të shkuar, Komiteti
Shtetëror i Kthimit dhe Kompensimit të Pronave në Tiranë mori vendimin që
pronësia mbi truallin ku ndodhet ky treg, t’i kalojë Myftinisë Shkodër. Pas
këtij vendimi, myftiu i Shkodrës, Muhamet Sytari, u ka kërkuar tregtarëve që të
lirojnë hapësirat, pasi do të shfrytëzohet nga ana e këtij institucioni fetar.
Prej ditësh, një përfaqësi e tregtarëve ka zhvilluar takime në Tiranë me
drejtuesit e Komunitetit Mysliman, por kjo çështje nuk është zgjidhur në favor
të tyre. Për këtë arsye tregtarët kanë protestuar para zyrave të Myftinisë së
Shkodrës, në shenjë sensibilizimi për gjetjen e një zgjidhjeje për ta, me
qëllim që të mos hidhen në rrugë të madhe. Në mbështetje të tyre ishte dhe kreu
lokal i Bashkimit të Sindikatave, Albert Tuka. “Shkaku i kësaj proteste ka të
bëjë me faktin se Myftinia Shkodër në mënyrë të jashtëligjshme kërkon që të
hedhë në rrugë të madhe 300 tregtarë. Këta tregtarë janë të ligjshëm në atë
treg, pasi nuk e kanë zënë në mënyrë të dhunshme, por në bazë të një
marrëveshjeje që kanë pasur me Bashkinë e Shkodrës”, deklaroi Tuka. Tregtarët i kanë bërë thirrje myftiut
të Shkodrës, në cilësinë e pronarit të ri të truallit ku ndodhet ky treg, që të
lidhë me ta një marrëveshje me qëllim lejimin e ushtrimit të aktivitetit. Këta
tregtarë ushtrojnë aktivitetin e tyre në tregun e njohur si ai i Zdrales prej
20 vitesh, në ambientet e ndërtuara në truall, atëherë i cilësuar pronë
publike. Tregu u ndërtua nga Bashkia e Shkodrës, me kontributet e vetë
tregtarëve. Aktualisht, fati i tregtarëve nuk dihet, pasi nga ana e Myftinisë
së Shkodrës nuk ka asnjë reagim. Nga ana tjetër, edhe Bashkia nuk ka asnjë
hapësirë të lirë për të sistemuar këta tregtarë. Pavarësisht me sa u tha nga tregtarët, ata
duhet të kuptojnë se pronësia e vërtetë i takon Myftinisë dhe vakufi më së
fundi iu kthye pronarit të vërtetë. Me siguri që do të gjehet një zgjidhje edhe
për tregtarët, por ajo që kërkohet tashti është rregullimi i kthimit të pronave
dhe destinacionit të kësaj prone. Dhe destinacioni i kësaj prone është vakëfi i
Myftinisë së Shkodrës.
12 ish të përndjekur politik në grevë urie
Një përplasje e ashpër fizike ndodhi mes deputetëve demokratë, ish të
dënuarve politikë dhe efektivëve të policisë para pak ditëve pranë selisë
së ish të përndjekurve politikë. Policia tentoi të ndalojë nisjen e grevës së
urisë nën pretendimin se nuk ka leje zyrtare. Kurse ish të dënuarit politikë u shprehën,
se kanë leje nga Bashkia e Tiranës dhe një kërkesë që kanë dërguar në Policinë
e Shtetit. Deputetët e PD, Flamur
Noka, Gert Bogdani, Aldo Bumçi kanë qenë prezent në momentet që një përfaqësi
nga ish të përndjekurit dhe të dënuar politikë po tentonin të fusin materiale të
ndryshme për të filluar grevën e urisë, që kanë bërë thirrje se do e nisin pranë
Institutit të të Përndjekurve Politikë. Forca policie nuk kane lejuar
futjen e materialeve (cadra, batanije, susta) dhe kanë debatuar dhe më pas
janë përleshur me ish te përndjekurit politikë dhe deputetet e PD. Fillimi i një greve tjetër urie nga ish të dënuarit
politikë është një shënjues i dhimbshëm, se kjo shoqëri nuk ka arritur të lajë
llogaritë e vjetra me këtë shtresë. Ndërkaq amendimi i ligjit për dëmshpërblimin
në pamje të parë të krijon idenë se po i ndihmon, ndërsa në të vërtetë kufizon
marrjen e këtij dëmshpërblimi nga ata që kanë mundur të marrin diçka deri
tashti. Kjo është me të vërtetë e hidhur dhe nuk është rilindje...
E vrau shtatzënë 5 muajshe, babai zbulon të
dashurin e së bijës
Doksan Dushku, ka rrëfyer për policinë personin për të cilin ka dyshime se
mund të ishte i ati i fëmijës së vajzës së tij. Madje Dushku ka treguar edhe
lidhjen miqësore që ka patur me personin, i cili sipas të dhënave i përket të
njëjtit fshat. Policia
mban sekret emrin e personit, ndërkohë që mësohet se orëve të vona të mbrëmjes
së mërkurë është kryer edhe ceremonia mortore e vajzës 21 vjeçe, që u ekzekutua
me 8 plumba nga babai i saj. 69-vjeçari bëhet e ditur se i ka treguar me detaje
para punonjësve të policisë së Dibrës gjithçka që i ka treguar vajza e tij dhe
më pas për të shuar gjurmët e shtatzënisë së saj ai ka vendosur ta vriste.
Ndonëse policia ka dyshime të forta, se në krim ka marrë pjesë edhe njëri prej
djemve të Doksan Dushkut, nga mënyra se si e ka rrëfyer ngjarjen burri, mësohet
se ka shkarkuar nga përgjegjësia ligjore të dy djemtë. Referuar të dhënave të pakta që
dalin nga policia e Dibrës në lidhje me dëshminë e personit që vrau vajzën,
bëhet me dije se personi që kishte krijuar lidhje me 21-vjeçaren ishte një
njëri i njohur për familjen dhe se sipas autorit të krimit, asnjëherë nuk i
kishte shkuar mendja që mund të abuzonte në familjen e tij. “Djemtë
nuk kanë lidhje me atë histori. I kërcënova se do t`i vrisja nëse do të
tregonin për ngjarjen. Gjithashtu i kërcënova se nëse do të afroheshin do t`i
vrisja edhe ata”. Kështu e ka shpjeguar mosimplikimin e tre djemve të tij
Doksan Dushku para policisë së Dibrës. I moshuari duke kuptuar se skenari për
të mbuluar vrasjen e vajzës si një ngjarje aksidentale ka dështuar, babai i
viktimës, ka pranuar të rrëfehet para oficerit të policisë gjyqësore me detaje
për krimin monstruoz të vrasjes së të bijës. Gjatë marrjes në pyetje, sipas
policisë, ai ka pranuar të tregojë një pjesë të së vërtetës, duke pretenduar se
ai e ka vrarë të bijën dhe se ka marr pjesë i vetëm në krim. Ashtu si cjapi i mëkateve një baba i moshuar ka marrë përsipër të gjithë këtë
ngjarje tragjike mbi shpinën e vet. Ai ka pranuar kështu të jetë vrasës dhe gjykatës
njëkohësisht, porse ka bërë një krim të dyfishtë duke gjykuar gabim. Mirë vajza
e tij ishte e fajshme, po ku e la dashnorin e vajzës? Mirë vajza e tij ishte e
fajshme, po fëmija në barkun e vajzës së tij çfarë faji kishte? Kjo është
injorancë njerëzore, që nuk të bën gjë tjetër por të çon në krime të njëpasnjëshme...
Komiteti Shtetëror për Kultet: Dënojmë vrasjet
brenda familjes
Komiteti Shtetëror për Kultet, së bashku me Bashkësitë Fetare dënojnë me
forcë krimet apo edhe dhunën brenda familjes. Reagimi ka ardhur vetëm pak ditë
pas dy ngjarjeve të rënda të krimit brenda familjes, ajo e Fushë-Kuqes dhe e
Peshkopisë. Sipas tyre këto krime cenojnë rëndë familjen dhe jetën e
individit, si e drejtë hyjnore dhe kushtetuese. “Ne besojmë se familja është
bërthama e shoqërisë, shkolla e vlerave dhe e dashurisë dhe si e tillë, duhet
të bëjmë çmos që ta mbrojmë atë nga krimi dhe dhuna. Jeta është dhuratë e Zotit
dhe si e tillë askush nuk ka të drejtë ta cenojë apo ndërpresë atë. Përtej
këtyre ngjarjeve të rënda, ne theksojmë se familja është institucioni i vetëm
ku buron jeta dhe dashuria, prandaj të gjithë duhet ta mbrojmë me forcë këtë
institucion kaq të rëndësishëm duke sjellë në vëmendjen e shoqërisë se dhuna
kurrsesi nuk mund të jetë zgjidhja e problemeve në familje”-thuhet në
deklaratën e Komitetit Shtetëror për Kultet dhe Bashkësitë Fetare. Më në fund po ndihen disa zëra të arsyeshëm. Janë
pikërisht këto komunitete që me punën e tyre të përditshme shpirtërore duhet t’i
japin vlerë jetës njerëzore. Shteti është një ingranazh mekanik që bluan, ndërsa
vlerat shpirtërore marrin jetë nga mësimet fetare që jepen në xhamitë. Njerëzit
u lanë pa fe, por ata nuk mund të jenë njerëz pa ditur vlerat shpirtërore.
Shënimi i JAVËS
Busulla
politike dhe busulla njerëzore në të shumtën e rasteve nuk përputhen. Një nga
dilemat më të forta jetësore për ata që kanë frerët e politikës është t’i përputhin
dy gjilpërat e këtyre busullave në një të mesme të artë. Gjithsesi politikanët
e kanë rëndom përfaqësimin e popullit në kuvend dhe që e marrin çdo katër vjet
nëpërmjet votimeve të përgjithshme, si dhe nëpërmjet të zgjedhurve lokalë. Në këto
23 vjet tranzicion një mesazh është i qartë, arena politike është e polarizuar ndërmjet
dy partive kryesore dhe aleatëve të tyre, partisë socialiste dhe demokratike. Në
gjithë këto vite pushteti ka pësuar një rotacion sa nga njëri krah në tjetrin. Pavarësisht
retorikave të fryra mediatike dy gjëra po vërehen qartas në të dy krahët. Partia
socialiste është trashëgimtarja në vijimësi me gjithë ndryshimet relevante
historike të pas 1990-ës e së majtës ekstreme, e cila humbi betejën moralisht në
favor të demokratizimit të shoqërisë dhe pluri-partitizmit. Pas rënies së
Bllokut Lindor Komunist e gjithë politika zyrtare u orientua nga Perëndimi dhe
nga Brukseli aktualisht. Ndërkaq partia demokratike dhe aleatët e saj janë përpjekur
ta drejtojnë Shqipërinë gjatë këtij tranzicioni të vështirë drejt demokracisë
dhe ngritjes së institucioneve të reja, që do ta orientonin vendin drejt një
sistemi të tregut të lirë dhe ngritjes së kapitalit vendas. Normalisht që kjo e
fundit është përpjekur me të gjitha forcat për të ngritur dhe mbajtur një
sistem të tillë. Si kundërpeshë ka pasur një kundërshtar të njollosur dhe që në
garën politike të vet ka pasur një synim të thjeshtë marrjen e pushtetit me çdo
kusht. Një gjë të përbashkët kanë pasur në këto 23 vjet të dy krahët e politikës
orientimin pro-perëndimor të tyre. Për pasojë edhe arbitrimi politik në rastin
e grindjeve të ndryshme ka ardhur nga Brukseli. Sistemi i tregut të lirë dhe
kapitalit tashmë ka zënë gjerësisht vend në mentalitetin e shqiptarit, por ajo
që na mungon në gjithë këtë zallamahi politike është busulla morale. Edhe nëse
ka pasur ndopak ndershmëri në politikë dhe në qëndrimet e saj janë zhdukur përballë
shfaqjeve propagandistike në media. Ndërsa e drejta për të protestuar është një
e drejtë legjitime e sanksionuar me ligj dhe me kushtetutë, drejtoria e policisë
ka ndërhyrë tre herë për të ndaluar mitingje të ndryshme me justifikime banale.
Normal që këto janë shkelje dhe pikërisht këto ditë kur politika dhe qeverisja
e këtij vendi po presin që Shqipëria të marri statusin e vendit kandidat për në
Bashkimin Evropian. Fatkeqësisht ndalime të tilla nuk janë vërejtur gjatë
qeverisjes së demokratëve. Gjithsesi ajo që na intereson në këto ditë nuk është
përshkallëzimi i zjarrtë i betejës politike pozitë-opozitë, por se sa do të jetë
në gjendje kjo pozitë të tolerojë në betejën e përplasjeve të përditshme politike.
Opozita ka përzgjedhur të veprojë brenda mundësive të saj politike, betejës parlamentare,
mediatike e protestave në shesh. Pretendime krejtësisht normale dhe veprime të
tilla që shkojnë për pasojë e asaj që deklarohet dhe pritet nga një opozitë
normale. Justifikimi deri tashti i qeverisjes ka qenë: “na lini të punojmë”,
apo edhe po pengoni marrjen statusit të vendit kandidat. Bashkimi Evropian është
një organizëm politik në radhë të parë, pastaj vijnë edhe vendimet ekonomike
apo financiare që merren nga ky organizëm. Për pasojë edhe vendimi për Shqipërinë
dhe hyrjen e saj në BE është politik. Kjo u pa qartësisht në futjen e Rumanisë
dhe Bullgarisë në BE. Ashtu si edhe ne sot, në atë kohë këto dy vende
ballkanike nuk i kishin plotësuar kushtet e vendosura, porse vendimi për t’i
futur në BE ishte politik dhe këto dy shtete gëzojnë lehtësitë e të qenit në
Bashkimin Evropian. Shumë gjëra nuk janë rregulluar ende dhe presin të
rregullohen, e normalisht organizmat e huaja të pranishme në vend e dinë dhe e
njohin mirë gjendjen tonë politike e shoqërore. Këto probleme janë të vështira për
t’u zgjidhur pavarësisht se opozita e djeshme e bëri fushë me lule zgjidhjen e
tyre kur do të vinte në pushtet nëpërmjet një fushate model në këtë drejtim. Ndërkaq
mbajtja apo mos-mbajtja e premtimeve elektorale kanë një kosto, e cila në një të
ardhme të afërt përkthehet në vota. Njerëzit fillimisht duhet të vendosin se me
kë duhet të jenë dhe ky është momenti vendimtar, ku gjilpëra e politikës me
gjilpërën njerëzore janë në anë krejtësisht të kundërta. Njerëzit kërkojnë
stabilitet ekonomik e punësim nga qeveria dhe ky rebus po rezulton i vështirë për
qeveritarët. Ndërkohë që dialogu pozitë –opozitë është ai më i vështiri i këtyre
ditëve të fundit dhe po ndjehet mungesa e tij. Barra kryesore bie mbi të gjithë
stafin qeverisës dhe ata i kanë çelësat e pushtetit dhe të gjithë ndryshimeve
ligjore që pasojnë nga parlamenti, e kështu ata kanë edhe përgjegjësinë totale
për të gjitha veprimet e tyre. E po ashtu duhet të kuptojnë, se nuk i hidhet
faji gjithmonë tjetrit. Nëse do të na jepet statusi nuk është se e meritojmë apo
fitore qeverisëse, por është sepse vendim-marrësit në BE e kanë dashur një gjë
të tillë.
Comments
Post a Comment